Auto fûr di strade par no cjapâ sot un cenglâr a Carlin

Incident îr sot sere a Carlin, indulà che il vuidadôr par no tirâ sot un cenglâr che al stave traviersant al è lat fûr strade e la machine si è ancje capotade. Il fat al è sucedût tor des dîs e mieze dilunc de strade provinciâl 3, in vie Marano. Par fortune l’om no si è fat nuie e al à rivât a saltâ fûr di bessôl de auto.

Vuê di matine invezit altri incident a Puçui, indulà che un motociclist di 19 agns dopo che si è dât cuintri di une auto al è finît sot di chê. Par tirâlu fûr a son coventâts i Vigjii dal fûc e i infermîrs dal 118. Il zovin al è stât puartât in cundizions griviis tal ospedâl di Udin. (a.d.g.) – 11.11.2025