Vot agns indaûr al jere stât acusât di vê puartât vie 155mil euros dal Comun di Dogne. Vuê il Gup di Udin Emanuele Lazzaro, su domande dal stes Pm, lu à assolt parcè che il fat nol sussist.
Gianpaolo Peruzzi, di 67 agns, resident a Tavagnà, al pues infin tirâ un suspîr di liberazion. La vicende e rimonte al 2012, cuant che al jere sindic di Dogne Zuanfranc Sonego. Sonego al veve scuviert une buse di passe 400 mil euros intes cassis comunâls. Intal 2014 Peruzzi, alore responsabil dai servizis finanziaris dal Comun, al jere stât acusât di jessisi apropriât di 155 mil euros, dal 2003 al 2013, fasint prelêfs no rindicontâts o cence nissune justificazion.
Il câs al à finît devant de Cort dai Conts che, intal 2018 e à condanât il Peruzzi a tornâ al Municipi plui o mancul 32 mil euros, ridimensionant lis domandis de Procure. Doi agns dopo, la Tierce sezion di apel de Cort dai conts e à assolt il dipendent comunâl di cuasi dutis lis acusis, ridusint il risarciment a 2.300 euros. Vuê la assoluzion di Peruzzi, difindût dal avocat Denêl Liani. (ADG) – 30.09.2022
