Come che nol fos avonde la crisi di tantis aziendis, a son ancje chei che a disin a peraulis di volê judâlis e che invezit a lavorin par svuedalis di chel pôc che al reste.
Al è il câs dal sisteme fat sù di un imprenditôr di Padue che al diseve di jessi un agnul dai afârs, scuviert de Vuardie di finance di Trevîs. La indagjin fate dai financîrs e à permetût il secuestri di 4,7 milions di euros, intant che a son indagâts dodis di lôr e al è saltat fûr che a son cjapadis dentri passe 30 aziendis tra Venit, Friûl, Lombardie e Toscane.
Il sisme al jere sempliç: comprâ par pôcs bêçs aziendis in crisi, puartâ vie ce che al valeve par jessi doprât in altris aziendis lassant un scus vueit. Al centri de associazion a delincui al jere l’imprenditôr venit, che dal 2025 si cjate ai arescj domiciliârs par fraude ingriviade e bancjerote.
