Une femine di origjin moldave di 59 agns e je stade condanade in prin grât dal judiç Mauro Qualizza, dal Tribunâl di Udin, a un an di reclusion par ats persecutoris, pene sospindude, acetant lis domandis dal Pm.
La assistente di famee si jere inamorade dal fi de anziane che e viodeve di jê (ancje chel aromai indenant cui agns) e par mês lu à tormentât cun desenis di messaçs sul telefonin.
La vicende e je de fin dal 2019, cuant che la femine e veve scomençât a scrivi al fi de anziane, che e veve viodût di jê fin a doi agns prime.
Intai mês seguitîfs lu à tampiestât di messaçs, mandâts a dutis lis oris, ancje di gnot. Cundut che l’om nol ves mai rispuindût ae cort insistente, la femine e je ancje lade prime intal paisut venit di origjin dal om e daspò a Udin, ma in dutis lis dôs ocasions, la vitime si è sierade in cjase par no ve a ce fâ cu la femine. La siore dut câs no molave e ae fin, intal Lui dal 2020, l’om al à decidût di denunziâ il fat. (ADG)
