Gnovis operazions de Polizie di Stât di Triest che, tra i 29 di Mai e i 2 di Jugn passâts, e à arestât cuatri forescj (un rumen, un turc, un serp e un cravuat di etât tra i 26 e i 35 agns) pal reât di favoriment de imigrazion iregolâr. Si trate di passeur che, cun veicui cun targhe comunitarie, a àn acompagnât in Italie 24 migrants iregolârs di nazionalitât afghane e turche. Di chescj, la metât a jerin minôrs di etât tra i 2 e i 17 agns; chê altre metât e jere pal plui di adults zovins. I veicui doprâts par puartâ i migrants a son stâts metûts sot secuestri ae fin des ativitâts di polizie. Cierts migrants, tra chei une famee cun doi fruts, a àn esprimût l’intindiment di domandâ la protezion internazionâl.
Lis operazions a son stadis fatis ai 29 di Mai, dongje dal centri comerciâl Montedoro intal comun di Mugle (cjatâts fûr 9 citadins afghans, tra chescj ancje fruts); ai 30 di Mai a Prebenic (intercetâts cuatri turcs), il prin di Jugn a San Giuseppe della Chiusa (cjatâts fûr siet turcs); e ai 2 di Jugn a Pese (un passeur cravuat al à acompagnât une famee turche). (A.D.G.) – 13.06.2023
