Arestâts a Tarvis doi passeur serps

La polizie di frontiere e à arestât a Tarvis doi passeur serps di 40 e 30 agns par vê fat jentrâ in maniere ilegâl in Italie 24 bengalês migrants. Al è sucedût te matine di martars passât, cuant che i poliziots a àn viodût i imigrâts e un dai doi serps dongje di une aree boschive, dulà che al jere stât abandonât il furgon doprât pal traspuart. A incjastrâ il passeur al è stât il filmât zirât cuntun smartphone di un dai migrants che al mostrave i moments de rivade. Chel altri citadin serp al è stât cjatât intune aree di fermade, dentri un altri furgon, intant che al jere daûr a spietâ il compliç. L’om al è acusât ancje di vê fat jentrâ in Italie altris 20 bengalês, il passât Avost. I arescj a son stâts validâts cheste matine dal Gip di Udin Mariarosa Persico, che e à decidût pai doi malvivents la custodie cautelâr inte preson di Udin. (ADG) – 29.09.2022