Al è stât puartât in preson un om talian che par une vore di dîs al à semenade pôre a Udin, pacant e menaçant la int par strade. Tra i 2 e i 4 di Jugn une cubie di anzians e veve scugnût lâ tal Pront socors dal ospedâl par vie des pachis cjapadis inte aree verde Ardito Desio, indulà che il dì prime un che al passave di chês bandis al veve cjapât un pugn tal voli dal stes delincuent che pocjis oris prime al veve pestât doi fantats in place Primo Maggio. Altris segnalazion a son rivadis di San Domenico li dal Parco di cemento.
Cundut che l’om al veve di rispietâ la improibizion di stâ a Udin lis violencis a son ladis indenant tant che al è stât pandût un ordin di custodie cautelâr permetint ai poliziots di blocâlu e puartâlu dentri. (a.d.g.) – 12.06.2025
