Un traficant domenican di droghe atîf intal spaç di cocaine tra lis provinciis di Trevîs e di Udin al è colât inte rêt tirade dai agjents de Scuadre mobile di Trevîs e di Udin, cuant che tal dopomisdì dai 18, cemût che e à fat savê la Polizie di Stât, al è stât arestât subit dopo che al veve cjapât di un corîr un chilo e 200 grams di cocaine.
I agjents a jerin in vuaite inte zone dal Terraglio a Trevîs par controlâ i siei moviments. L’om al veve cjapât a fit in maniere temporanie un apartament là che si intratignive cuntune sô conazionâl di 45 agns e, doprant dôs autoveturis, une cjapade a nauli e une intestade a une tierce persone, cun targhe spagnole, si moveve tra Venit e Friûl-Vignesie Julie par distribuî il stupefacent.
Inte abitazion dal traficant e je rivade une sô conazionâl, risultade jessi la cusine rivade di Barcelone, che e traspuartave un pachet cun dentri 1,2 chilograms di cocaine.
Cjapât in flagrance al moment de consegne, l’om al à reagjît provant di fermâ un agjent prin cuntun curtìs di cusine e dopo, stratignintlu cu la fuarce par permeti ae femine di rivâ al apartament e sierâsi dentri. I agjents a àn sfonderât la puarte e fat iruzion inte abitazion, imobilizant dutis lis personis e procedint ae percuisizion.
La percuisizion e à permetût di cjatâ, di là de cocaine a pene consegnade, 112 grams di amfetamine, 1.575 euros in contants e materiâl par pesâ e confezionâ la droghe. Altris 770 grams platâts in dopli fonts rigjavât sot de sente anteriôr diestri de autoveture Seat Ibiza cun targhe spagnole
L’om e la cusine a son stâts arestâts e puartâts in maniere rispetive inte Cjase Circondariâl di Trevîs e di Vignesie, in spiete de udience di validazion. Chê altre femine dominicane, cjatade in compagnie dal om e je stade denunziade a pît libar.
In plui che dal possès dal grant cuantitatîf di cocaine, l’om al varà di rispuindi ancje di resistence a uficiâl public agravade e puart abusîf de arme doprade par agredî i agjents. (A.D.G.) – 21.03.2023
