La zonte comunâl e à aprovât il progjet di fatibilitât tecniche – economiche pe ricualificazion di place San Cristoforo e Riva Bartolini a Udin. Si trate di un intervent par meti a puest une des puartis plui impuartantis par jentrâ tal centri storic de citât, che al costarà un milion e 600 mil euros.
Il progjet al à za vût il vie libare de Sorintendence e al ponte a miorâ la acessibilitât e la cualitât dai spazis publics puartant indenant la estetiche e i lavôrs di rigjenerazion urbane za fats in vie Mercatovecchio e inte place Marconi. Si trate dal prin lot dal grant progjet di ricualificazion che al cjaparà dentri ancje vie Gemona. Par cheste opare cumò al varà di jessi aprovât il progjet definitîf timp 60 dîs, intant che lis garis e varessin di terminâ dentri de fin dal an. Tal principi dal 2027 e tacaran i lavôrs che a varessin di lâ indenant par 11 mês. (a.d.g.) – 02.07.2026
