Sul Friûl al è rivât un altri scufiot par cause dal maltimp che, tacant di îr sore sere e fintremai vuê di buinore, al à batût dut il teritori cun aiaron e ploiis pardabon fuartis, causant inagaments, slacs, arbui crevâts e cetancj problemis dilunc de viabilitât.
A son stâts passe dusinte i intervents dai Vigjii dal fûc e dai volontaris de Protezion civîl, soredut in Friûl inte zone culinâr e intal Friûl Ocidentâl, che a àn cussì passât une altre gnot di passion.
Dams a son stâts regjistrâts soredut a Pinçan, Pordenon, Monfalcon, Dartigne, Tavagnà, Tarcint, Buie, Trep Grant, Ruvigne, Reane dal Roiâl, Cjassà, Cjanive, Tresesin e a Magnan, indulà che la aghe e je jentrade dentri dôs cjasis di polse tor des 11 di sere.
Il flum Meschio e il torint Grava a son lâts fûr, provocant inagaments a Cjanive in plui di 18 abitazions e inte frazion di Frate. A Dartigne al è lât fûr daspò de roture de roste il torin Clama che al à inagât une cjase e blocât par oris cetancj sotpàs des bandis di Tresesin e Reane dal Roiâl. Cierts slacs a àn cjapât invezit la Alte Val de Tor cun claps colâts su la strade regjonâl bande Lusevare.
Intant che o scrivin un fuart temporâl al sta cjapant dute la part basse de regjon. (a.d.g.) – 08.07.2025
