Fin de setemane dificile tal Cpr di Gardiscje par vie des enesimis provis di fuide che si son verificadis par doi dîs di file. Sabide dopomisdì une desene di detignûts e à provât di scjavalgjâ il mûr di cente de struture. Di gnûf, intal dopomisdì sul tart di îr, un altri grup al à provât di slontanâsi de struture, par dopo fermâsi. Chê di îr e je stade la tierce prove di fuide dal Centri in Fevrâr: intal prin câs, un tunisin si jere infortunât in maniere serie al bacin svuelant ju’ in maniere pesante dal cuviert. Lis provis di scjampâ de ex caserme Polonio a son une vore di diviers mês in ca, e ancje lis rapresentancis sindicâls dai orghins di polizie si jerin fatis sintî a principi di Fevrâr cuntune note dal Sim Carabinieri: “No podìn spietâ di viodi – al veve sotlineât – l’enesim coleghe ferît par vie di mancjancis obietivis di cui che al varès di garantî une struture contenitive sigure”. La posizion e je condividude dal sindic di Gardiscje Linda Tomasinsig che, dopo i episodis di chest fin de setemane, e declare: “O sostignìn lis domandis dai sindicâts des fuarcis dal ordin. A son dubis fuarts su la struture dal pont di viste de sigurece dai operadôrs des fuarcis di polizie e a chest pont ancje dai citadins”. (a.d.g.) – 26.02.2024
140
