Ancjemò ne persone sot de nêf par vie di une lavine

Pôc dopo des 5 sot sere di vuê une persone e je stade cjapade ad implen di une lavine vignude ju tai boscs tra la Mont Prasnig e la Mont Sante dal Lussari, a plui o mancul 1.600 metris di cuote.

Al è stât dât daurman l’alarme e a son partidis lis scuadris dal Socors alpin de stazion di Rabil e chê de Vuardie di finance, adun cun personâl sanitari e ambulance, ma lis cundizions dal timp a son pardabon grivis.

Propit par cause dal mal timp nol è stât pussibil fâ jevâ l’elicotar e i tecnics a son rivâts i cuote cui implants par dopo lâ bande de zone. (a.d.g.) – 04.02.2026