Ancjemò lavoradôrs in neri scuvierts intai cjamps de Vuardie di finance

da Alessandro Di Giusto

Cinc lavoradôrs in neri, ducj origjinaris dal sub continent indian, a son stâts cjatâts impleâts in neri intes tignudis di dôs aziendis agriculis dal Friûl Ocidentâl. I doi controi a son stâts fats sabide ai 17 di Fevrâr, par opare des Flamis Zalis e dal Ispetorât teritoriâl dal lavôr di Pordenon.

Intun cjamp intal comun di Sacîl a son stâts cjatâts un bracent agricul pakistan e un indian; intune tignude di S. Zorç de Richinvelde a son stâts identificâts invezit 3 lavoradôrs iregolârs bengalês.

Ai doi datôrs di lavôr e je stade aplicade, par ognidun dai assegnâts, la sanzion di 1.800 a 10.800 euros, dopleade pal titulâr de aziende di S. Zorç de Richinvelde par vie che al jere recidîf ae violazion. Par ducj i doi al è stât adotât daurman dai funzionaris il proviodiment di sospension de ativitât, vint impleât personâl cence contrat in misure superiôr al 10% dai assegnâts regolârs.

Dal principi dal an a son 51 i lavoradôrs in neri e 3 chei iregolârs scuvierts des Flamis Zalis dal Friûl Ocidentâl; 30 i datôrs di lavôr sanzionâts e 19 lis ativitâts sospindudis, a conferme dal impegn profondût intal monitorament economic finanziari dal teritori a difese des realtâts imprenditoriâls locâls che a crodin e a operin intune economie “sane” e bondançose. (a.d.g.) -19.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui