Ancjemò int cjoche ator par strade e atris patentis ritiradis

A van indenant i controi dai carabinîrs dilunc des stradis dal Friûl e come simpri no mancjin chei cjatâts cjocs intant che a vuidin. A son stadis cinc lis denunziis par vuide in stât di ebrietât, cjapât dentri ancje l’automobilist jessût fûr strade a Paulêt. A Cividât un zovin di 29 agns al lave ator suntune moto cence vê la patente, intant che a Tisane un altri zovin al è stât segnalât par possès di hashish.

A son stâts fats controi ancje a Palaçûl indulà che un locâl al à cjapât dai Carabinîrs dal Nas e dal ispetorât dal lavôr siet mil euros di multe par violazions su lis normis di sigurece (estintôrs cence manutenzion) e mancjancis igjienichis e struturâls. (a.d.g.) – 21.04.2026