Ancjemò fraudis cuintri dai anzians, vitime une siore a Pordenon

Al somee che no vedin di lâ in vacance i delincuents che a fraudin i vielis ator pe regjon. Cheste volte e je tocjade a une femine di 75 agns di Pordenon, che ae so puarte si son presentâts in trê, doi che a disevin di jessi tecnics dal gas e un vistût cuntune gjache blancje cu la scrite “Polizia Comunale”.

La scuse e jere chê di simpri: fâ controi par une fuide di gas,ma cuant che a son jentrâts dentri cjase a àn convinçût la siore a meti intun cjanton dute la robe di valôr cu la scuse che e podeve dâ fastidi ai lôr struments. Cuant che la proprietarie si è distrate un moment, dute la robe e je sparide adun cui trê delincuents. La vitime e à fate denunzie ai carabinîrs di Pordenon. (a.d.g.) – 22.07.2025