Al è salf par miracul un om di Glemone, classe 1956, vitime di une pericolose cjadude, cheste matine, jù de creste de Mont Verzegnis.
La clamade al 112 e je rivade pôc prime de une dopomisdì de bande dal so compagn di escursion, che lu à viodût lâ jù tra la Mont Verzegnis e Casere Vâl, lunc il troi Cai 806, a cuote 1.650 metris.
L’om al è tombolât lunc une cleve une vore erte par cincuante metris, fermantsi pôc parsore un salt di une desene di metris che al sarès stât fatâl.
Cundut di une feride grave al cjâf e variis contusions, l’om al è rivât a movisi di cualchi centimetri, lontan dal ôr dal salt, e a restâ simpri cussient fin ae rivade dai socoridôrs, disbarcjâts cul elisocors regjonâl un ae volte su la cleve dopo une manovre une vore impegnative. (ADG) – 12.09.2022
