Gnûf colegament pal prossim Istât tra Triest e Olbia. Lu garantirà Ita Airways che – intune note – e sclarìs che i svoi a scomençaran ai 22 di Lui e a laran indenant fin ai 3 di Setembar.
I svoi a saran doi par setemane: la sabide cun partence di Triest aes trê e vincjecinc dal dopomisdì e ripartence di Olbia aes cinc e vincjecinc dal dopomisdì e la domenie cun partence aes trê e cinc dal dopomisdì e ripartence di Olbia aes cuatri e cincuantecinc dal dopomisdì.
I colegaments a saran fats cui gnûfs Airbus A220-300, avions di ultime gjenerazion di 148 puescj che a son jentrâts a pene a fâ part de flote.
Ita Airways, cun di plui, e à confermât che dal prin di Avrîl e potenziarà i colegaments tra Triest Airport e Rome Fiumicino: i svoi zornalîrs a laran sù di fat a cuatri, consintint la programazion di viaçs di lade e tornade vie pal dì. (A.d.L.) – 28.03.2023
