Un om di 32 agns, che al viveve intun paîs dogje , al è muart intant che al jere presint a une videoconference. Dôs personis, dal Venit e de Campanie, che a partecipavin al avigniment a àn domandât jutori ae Sores, ma no cognossevin il racapit dal om. I sanitaris a son lâts ae ultime residence uficiâl a Cividât, dulà che invezit a vivevin i gjenitôrs.
A chel pont i operadôrs de Sores a àn inviât par timp une ambulance di Udin, inte direzion indicade dai gjenitôrs (assistûts in cheste situazion dramatiche dal personâl sanitari de prime ambulance che a vignive di Cividât).
Apene rivâts, cul supuart ancje dai Pompîrs par vierzi la puarte (e di un parint), i sanitaris a son jentrâts inte abitazion cjatant l’om cence sintiments: a àn scomençât daurman lis manovris di rianimazion, ma pal om, magari cussì no, nol è stât nuie di fâ. (ADG) – 6.10.2022
