Tornâ a vierzi la strade ex provinciâl 42 dopo il fûc che, dai 20 ai 29 di Lui, al à isolât la Val Resie e plui di mil dai siei abitants. Chest l’obietîf dal incuintri fat intal Municipi di Resie, presints la prime citadine Anna Micelli, il sindic di Resiute, Francesco Nesich, il comissari Augusto Viola e l’inzegnîr Marco Domenighini (referents de Edr, l’Ent di decentrament regjonâl), il gjeolic Andrea Mocchiutti e, pe Protezion civîl regjonâl, il gjeometre Cesare Nonino.
Par une ricognizion complete dai lavôrs di fâ e dai coscj si varà di spietâ la fin di Avost e dome cun Setembar al sarà pussibil tornâ a vierzi in sigurece la strade cuntun sens unic alternât; pe viertidure complete si varà di spietâ la seconde metât di Otubar. (A.D.G.) – 13.08.2022
