Al dâ cuintri ai carabinîrs che lu vevin cjatât a durmî intune rimesse

Un om di 30 agns cence cjase al è stât blocât doprant il taser, cualchi dì indaûr a Udin, daspò vê dât cuintri ai carabinîrs.

I militârs a jerin intervignûts, su clamade dal proprietari che lu veve scuviert dentri, par slontanâlu di une rimesse privade, indulà che l’om al jere lât a durmî, intun condomini dongje de stazion dai trens.

Cuant che l’om al à viodût i carabinîrs dal Nucli radiomobile al à dât daurman cuintri e al à tirât un pugn su la muse a un di lôr.

Il scalmanât al è stât blocât e arestât cu la acuse di violazion di domicili, danezament, resistence e e lesions a uficiâl public. (a.d.g.) – 26.06.2026