Al continue il trafic di oms al confin

Dîs mil euro partint de Turchie e 2.500 de Serbie. Tant a àn paiât par rivâ in Austrie, e di lì continuâ il viaç viers de Italie, i cuatri migrants iregolârs, ducj di nazionalitât egjiziane, intercetâts ae bariere di Ugovize la fin de setemane passade. Trê i passeur arestâts des fuarcis dal ordin.
I prins doi imigrâts a son stâts cjatâts intune machine cun targhe austriache sabide di matine. La veture e jere vuidade di un egjizian di 25 agns resident in Austrie, acompagnât di un austriac di 22 agns, ducj i doi arestâts.
Chei altris doi forescj iregolârs a son stâts individuâts domenie dopomisdì intun mieç cun targhe taliane vuidât di un egjizian di 43 agns resident in provincie di Vignesie. L’om, dopo l’arest, al à afermât di jessi il barbe di un dai doi forescj e di vê dât lôr un passaç. Vuê il Gip di Udin Matteo Carlisi al à validât il fer dal trê passeur, disponint la improibizion di fermasi in regjon. (ADG) – 5.10.2022