Manifestazion pacjifiche vuê di matine a Pordenon par denunziâ, ancjemò une volte, i problemis che la agriculture e sta frontant aromai di timp. A inmaneâ la manifestazion il Comitât spontani agricultôrs che, cuntun centenâr di lôr, a à tacât un corteu cui tratôrs dal parc de Sme par rivâ ae fin in place XX Settembre.
In cheste maniere si voleve protestâ soredut su trê cuistions: la pierdite di vuadagn, l’acuardi Ue-Mercosur che, secont il comitât, al puartarà ca di noaltris mangjative di divignince pôc clare e, di ultin, la necessitât di gjavâ vie burocrazie di un sisteme che al va a risi di fâ colassâ lis aziendis agriculis.
Al baste pensâ, a visin chei dal comitât, che in Friûl-Vignesie Julie tai ultins agns il 20% dai imprenditôrs dal setôr si è rindût. De bande dai agricultôrs al à declarât la sô poie l’assessôr regjonâl aes Risorsis agroalimentârs Stefano Zannier. (a.d.g.) -13.02.2025
