Agjents fals a robin bêçs e zoiis a une anziane a Cormons

Imbroi cun robarie ai dams di une anziane residente in plen centri a Cormons. Doi oms zovins a àn contatât par telefon la femine vendintsi par Fuarcis dal ordin e si son presentâts pôc dopo a cjase sô. Intant che un dai doi malvivents al tignive cjapade la siore, chel altri al à robât ducj i bêçs e lis zoiis presintis in cjase. La cubie di laris e je scjampade dopo cuntune auto blancje. Sul fat, sucedût tal dopomisdì di miercus, e indaghe la polizie municipâl: elements fondamentâi par cjatâ fûr i responsabii di chest reât a podaressin rivâ des 25 telecjamaris targa-system in funzion tra centri e perifarie. Un control al sta di fat sucedint in chestis oris su dutis les plui o mancul 5 mil auto di colôr blanc transitadis intal arc orari tra misdì e lis sîs di sere sul teritori comunâl. (a.d.g.) – 19.01.2024