A Triest, il pazient al è un robot che al fevele

E somee fantasience, e invezit e je la realtât. La Universitât di Triest e je daûr a sperimentâ – prime di ducj in Europe – une sorte di robot ‘umanoit’, dotât di inteligjence artificiâl, articui robotizâts e reazions fisiologjichis veris. Definît il robot “plui realistic tal mont” e clamât Hal s5301, al è stât instalât intal Centri di simulazion mediche e adestrament dal ospedâl di Cattinara. Prodot de aziende Accurate-Gaumard Scientific, al è un concentrât di diviersis patologjiis, al pues ancje sudâ e fevelâ e al sarà doprât par potenziâ e sfrancjâ l’adestrament dai miedis. Pe prime volte, la inteligjence artificiâl e je stade integrade intun simuladôr umanoit in medisine: une oportunitât impuartante par miorâ l’adestrament dai professioniscj sanitaris. (A.I.) – 09.05.2023