Memoreâts cheste matine a Marcinelle in Belgjiche i minadôrs muarts ai 8 di Avost di 68 agns indaûr inte miniere di cjarbon Bois du Cazier. Chel dì un fûc, disvilupantsi in principi intal condot di aiar principâl, al à jemplât di fum lis galariis provocant la muart di 262 personis: di chei, 136 a jerin imigrâts talians e 7 coregjonâi (Pietro Basso di Banie, Mario Buiatti di Udin, Ruggero Castellani di Roncjis, Lorenzo Di Santis di Flaiban, Ferruccio Pegorer di Daçan, Ciro Natale Piccolo di Paulêt e Armando Zanelli di S. Zorç di Noiâr). Ae tragjedie a jerin scjampadis dome 13 personis. Il disastri al è stât classificât tant che il tierç incident plui grâf pal numar des vitimis tra i imigrâts talians tal forest.
Numerosis lis coronis di rosis poadis vuê ae jentrade de miniere, aromai dismetude e jentrade a fâ part dai patrimonis storics de Unesco. Ae zornade dal Sacrifici dal Lavôr talian tal forest, a jerin presints la Regjine Paola Ruffo di Calabria e il ministri dai Afârs Forescj Antonio Tajani, di là di esponents regjonâi e rapresentants dai coregjonâi dal Friûl-Vignesie Julie intal mont. Tra chescj, il president de Clape intal Mont Lucio Gregoretti, il vice Mario Salvataggio, il Unuci di Monfalcon cul president Giovanni De Manzini e il Eraple (Ent Regjonâl ACLI pai Problemis dai Lavoradôrs Emigrâts dal Friûl-Vignesie Julie) cu la vice presidente Bruna Zuccolin e il diretôr Cesare Costantini, di là dal diretôr di Radio Onde Furlane, Mauro Missana. (a.d.g.) – 08.08.2023
