A Bibion, studât il fûc, si impiin lis investigazions

Al è stât viert un fassicul par fûc dolôs a caric di no cognossûts dopo il fûc che la fin de setemane passade al è sclopât inte pinede di Bibion, brusant 40 etars, che dome par miracul – e pal pront intervents des vuardiis dal fûc – no si è slargjât, e nancje nol à rivât a Lignan, li dongje. Pal moment no son elements par dî che cualchidun, vinars passât, al vedi impiât in efiets il fûc ae pinede, che si cjate intune aree protete, o che invezit si sedi tratât di un incident o dal risultât di une distrazion, tant che une cjiche di spagnolet no distudade. Il fassicul cun ipotesi di reât al permet di dâ une valence legâl ai esams e ai risultâts: in particolâr, chei su cualchi campion di teren intai ponts dulà che a son partidis lis flamis e suntune taniche di fier cjatade in bande di un pontîl sdrumât dome in part dal fûc. (A.I.) – 19.07.2022