A 11 mil fameis, 74 milions di euros di aiûts pai dams dal brut timp

“Vie libare al prin decret di concession dai aiûts pai dams patîts dal patrimoni edilizi abitatîf a continuazion dai avigniments meteorologjics che si son verificâts dai 13 di Lui ai 6 di Avost dal 2023, che al individue 10.776 beneficiaris privâts par un valôr complessîf di risorsis assegnadis pâr a plui di 74,5 milions di euros”.
A dâ l’anunzi a son il governadôr Massimiliano Fedriga e i assessôrs regjonâi ae Protezion civîl Riccardo Riccardi e aes Infrastruturis Cristina Amirante. “Su la base di ce che al è previodût de delibare che di fin Dicembar – a sclarissin – il ristôr concedût al cuvierzarà il 45 par cent des vôs di spese amissibilis o sedi: i elements struturâi e lis finiduris internis e esternis de cuviertidure (il tabâr di cuviertidure) e i sieraments di là des prestazions tecnichis e la ativitât di supuart al inseriment des istancis. Il contribût concedût al larà di un minim di 50 euros fin a un massim di 30 mil euros e al podarà jessi cumulât cu la indenizazion assicurative fin ae concorence massime dal 100 par cent dal incident patît. Lis tipologjiis di dam paiadis a permetaran di restaurâ lis cundizions di ûs de abitazion e a cuvierzin il 91 par cent dal totâl des domandis presentadis, par un cuintrivalôr di plui di 96 milions, cifre che e vignarà impegnade a cuviertidure de spese previodude. “Intai dîs che a vegnin – a sclarissin ancjemò Fedriga, Ricardi e Amirante – ai beneficiaris individuâts dal prin decret e vignarà inviade une comunicazion personâl al indreçament di pueste eletroniche indicât in domande; in cheste si domandarà di cjapâ vision dal decret che al conten l’impuart dal ristôr concedût par ogni sogjet”. (a.d.g.) – 08.02.2024