La grande statue proponude dal scultôr Franco Maschio a Maian, il so paîs, e à scjadenât une tampieste rivade dentri dal Consei comunâl.
Un monument aes polemichis, rivadis in Consei comunâl tant che la cuistion e je deventade ancje politiche. La sculture proponude dal artist Franco Maschio, te suaze dal cincuantesim aniversari dal taramot, e je al centri di une fuarte discussion tra il conseîr Patrick Bortolotti, cjâf grup di Destra Unita, e de Aministrazion comunâl vuidade di Elisa De Sabbata. Bortolotti al à presentât une mozion indulà che al critiche la decision di tornâ indaûr sul vie libare dât al scultôr dopo che propit il grup di oposizion al veve otignût de Regjon, in graciis dal interessament dal vice president Mario Anzil, ducj i bêçs – si fevele di passe 110 mil euros – che a coventavin par fâ sù la grande sculture di açâl alte sîs metris e poiâle suntun basament alt un metri, fat a pueste, sul Cuel dal Fum.
Inte sô mozion Bortolotti al domande che al sedi fat un referendum popolâr par domandâ ae int di Maian se meti o no la grande statue. “Tal principi di cheste storie – al vise Bortolotti – un dai problemis al jere chel dai bêçs. Par chest si sin metûts in vore daurman e o vin otignût de Regjon ducj i fonts che a coventin, ma nol va ancjemò ben, forsit parcè che chei bêçs ju vin cjatâts nô, ma cussì o sin a risi che la sculture e ledi a Colorêt, indulà che la Comunitât culinâr e je ben contente di vêle”.
Maschio nus à contât di jessi une vore deludût: “No mi spietavi cheste robe. Prime mi àn dit che a jerin dacuardi e che il probleme al jere il cost, dopo che i bêçs a son stâts cjatâts in graciis dal interessament di Bortolotti, a àn cambiade idee e mi àn domandât ancje di fâle plui piçule. La statue di açâl e somearès a chê di len che si cjate tal Domo di Vençon, dome une vore plui grande. No soi disponibil a tornâ a meti in discussion chest progjet parcè che al vignarès mancul il sens stes de sculture fate parcè che il furlan al tiri sù il cjâf cjalant il cîl. No mertavi un tratament cussì dal gno paîs”.
Elisa De Sabbata, sindiche di Maian, e conferme che la propueste fate tal Jugn dal an passât e jere stade acetade cundut che a jerin dubis. “Maschio nus veve domandât di fâ une sculture cuntun cost che al jere une vore alt parcè che si fevele di plui o mancul 130 mil euros, che di chei 110 mil a rivin de Regjon. Par chest o vin dât il vie libare, ma o vevin domandât di sbassâ la altece de sculture ancje par ridusi la spese. Il Comitât inmaneât pal cincuantesim dal taramot, che al ten dentri ancje une dozene di rapresentants des associazions e dai comitâts di frazion, cuant che o vin proponût la statue di Maschio nus àn dit che une opare cussì grande no lave ben ancje parcè che e costave masse, che no jere origjinâl e che a jerin za doi monuments dedicâts al taramot. Stes parê al è rivât ancje dai ex aministradôrs e cussì o vin domandât a Maschio se al podeve tornâ a viodi il so progjet, ancje parcè che altris oparis proponudis dal scultôr di altris bandis a costavin une vore di mancul e al à daurman rispuindût di no, par dopo lâ a domandâ ae Comunitât culinâr se e voleve vê la statue che e vignarès metude denant dal cjistiel dongje dai parcaments su la drete. De Comunitât e je rivade disponibilitât, ma a chest pont al è Patrick che al ponte i pîts, forsit parcè che si svicinin lis elezions”.
La mozion presentade da Bortolotti no je passade e a chest pont al è une vore probabil che la statue di Maschio e cjapi la volte di Colorêt di Montalban. (a.d.g.) – 07.05.2026
