Tra progjets confermâts e gnovis liniis di studi, il Cro (Centri di riferiment oncologjic) di Davian al cjaparà plui di un milion di euros tal 2026.
La Airc, (Associazion taliane pe ricercje sul cancar), e supuartarà vot progjets tal an che al ven. Dentri des gnovis areis di ricercje a son il studi vuidât di Barbara Belletti (Oncologjie Molecolâr), che al analizarà cemût superâ la resistence ae terapie endocrine intal cancar al sen; il grup ematologjie – oncologjie coordenât di Valter Gattei al studiarà la evoluzion clonâl inte leucemie linfocitiche croniche; il grup di Roberta Maestro (oncogjenomiche) al cirârà di identificâ gnovis vulnerabilitâts intai sarcoms.
Cun di plui, pe prime volte, il Cro al à ricevût une borse di studi Airc par zovins ricercjadôrs che, dopo un periodi tal forest, a àn decidût di tornâ in Italie. (a.d.g.) – 23.12.2025
