La Procure di Udin e à dât il vie libare ai funerâi di Aldo Maklaj, il zovin di 20 agns di Udin che al jere muart te buinore di joibe ai 4 di Setembar intun incident dilunc de strade Pontebane a Cjampfuarmit.
Al è stât daurman un grant corot pe muart improvise di Maklaj, une vore cognossût pe sô ativitât sportive tal balon e par jessi considerât di ducj un brâf zovin, tant che indulà che al è sucedût l’incident subite tancj zovins a àn metût rosis, spagnolets e sfueis par memoreâ Aldo.
Il funerâl al sarà celebrât joibe ai 11 di Setembar aes dîs e mieze di matine te glesie di S. Antoni dai Riçs, indulà che il cuarp dal sfortunât zovin al sarà puartât rivant de cjase funerarie Mansutti in vie Calvari, che si cjate daûr dal cimitieri di S. Vît a Udin. (a.d.g.) – 09.09.2025
