Passe 1.500 atletis, che a rivin di 60 Sezions de Associazion nazionâl alpins, trê comuns cjapâts dentri e cuatri dîs plens di sport e di events. A son in struc i numars des “Alpiniadi”, i campionâts dal Istât rivâts ae lôr cuarte edizion, tacadis vuê in Cjargne, tra Darte, Paluce e Tumieç, e fintremai a domenie ai 5 di Lui.
La prime edizion e je stade fate tal 2014; di chê volte ogni 4 agns, i alpins si dan apontament par partecipâ aes garis. Chest an lu fasaran dilunc dai percors colaudâts de Fidal, dilunc dai trois che a passin tai lûcs leâts ae storie des trupis alpinis e ae culture de mont cjargnele.
Vuê a Darte e je stade la sfilade tal centri citadin, compagnade de fanfare de Brigade alpine Julia e l’impiament de flame. Doman a Tierç di Tumieç la prime gare (partence aes 9 di matine) pe corse su la mont a stafete. I atletis a varan di cori dilunc un percors di 5,8 chilometris cuntun disnivel di 330 metris o suntun percors di 7,2 chilometris cul stes disnivel.
Sabide ai 4 di Lui a Paluce e sarà, li dai lâcs piçui dal Timau, la marcje di regolaritât su la mont a patuliis. Lis scuadris cun trê atletis ognidune, a fasaran un percors di 15 chilometris. La gare individuâl e sarà invezit fate ai 5 di Lui a Darte cun doi percors: il prin curt di 7,2 chilometris par 450 metris di disnivel, e un altri lunc 11 chilometris par 650 metris di disnivel.
Simpri a Darte, il cûr des “Alpiniadi”, a saran fatis lis premiazions, a saran il pont pal acet e dute une schirie di events. Cussì il conciert di Maurizio Soleri aes 9 sot sere il prin di Lui in place Roma e la esibizion di Sabrina Silvestrin, che invezit e sunarà cu la sô armoniche inte tensostruture in place Roma. Vinars ai 3 di Lui la conference “I alpins e il sport” li dal Palaç Savoia, intant che sot sere, aes 5.30, a cjantaran i côrs alpins. Sot sere dai 4 al sunarà il complès folk “I splumâts”. Par finî, domenie ai 5 di Lui, simpri a Darte in place Roma al sarà il marcjât dai prodots tipics e artesanâi.
“Si trate – al à visât Sebastiano Favero, president nazionâl de Ana – di un event une vore spietât di chei che, tra i nestris socis, a zontin il spirt dai alpins ae passion pal sport. La sezion Carnica, cui siei trente grups, e à lavorât cence sparagnâsi par une vore di mês, cirint prime di dut di cjapâ dentri, il plui pussibil, il teritori, che di lui a dipendin il gradiment e il sucès dal bon acet”. (a.d.g.) – 02.07.2026
