Sucès pal incuintri inmaneât di Enel e carabinîrs cuintri des fraudis

E jere tante int vuê a Udin tal incuintri inmaneât de Enel e dai carabinîrs par fevelâ di fraudis, che tant pinsîr a dan ai citadins.

Tal Spazio Enel in vie Savorgnana 15 al à fevelât il tenent colonel Ivano Bigica, comandant dal Repart operatîf dal Comant provinciâl di Udin, che al à dât informazions utilis e struments par ricognossi e prevignî i tentatîfs di fraude, fats cui sms, cui messaçs di pueste eletroniche, cui intervents fals di assistence e cu lis telefonadis.

Dome tal 2025 Enel e à vût in dute Italie 18.500 segnalazions di fraudis pussibilis , rivadis tal 99% dai câs di numars che no si pues savê  cui che les à fatis. (a.d.g.) – 18-06-2026