La solidarietât dai alpins no si ferme mai. Ve chi parcè che i alpins di Vençon dal Grup Ana 8° Reggimento a àn pandût fûr il progjet “Alpini per GasliniInsieme”, che al ponte a sostignî la associazion GasliniInsieme ETS, impegnade tal dâ acet e supuart aes fameis dai frutins malâts che a vegnin curâts tal istitût Giannina Gaslini di Gjenue.
Par fâ chest i alpins di Vençon a proponin un ûf di Pasche e la colombe: il 70% dal vuadagn al larà ae associazion, intant che il 30% al sarà doprât par judâ progjets solidaris in Friûl, lant cussì indenant tal impegn sul teritori.
Par podê prenotâ ûf e colombe si pues compilâ il modul che si cjate sul sît dal Grup www.gruppo8rgtalpini.it.
La sielte di judâ la associazion di Gjenue no je fate a câs, parcè che propit tal cjâf lûc de Ligurie dai 8 di Mai e sarà la Adunade nazionâl. E cussì, i alpins dal grup Ana 8° Reggimento a partiran di Vençon ae volte di Gjenue cu la biciclete par consegnâ i bêçs tirâts sù cun cheste iniziative. “Cui che al compre l’ûf e la Colombe no dome al cjaparà prodots di cualitât – al vise il president de sezion Gianluca Melillo –, ma al fasarà un gjest tal concret di solidarietât, judant cui che al à plui bisugn”. (a.d.g.) – 30.03.2026
