Cualchidun forsit si vise di chel frut di Glemone che, ai timps dal taramot, al jere in pinsîr pal fat che lis cisilis, par vie des cjasis sdrumadis, no varessin plui cjatât un puest indulà fâ il nît.
In dì di vuê lis cjasis a son in pîts, ma di cisilis ‘nd è simpri di mancul e, se si va indenant cussì, il lôr svol maraveôs e plen di ligrie al sarà tal zîr di pôc timp dome un ricuart. Cuant che si fevele di chescj uciei si cjape dentri speciis diferentis: e je la cisile comune (hirundo rustica), la cisile plui grande “rondon” (apus apus) e il rondin (Delichon urbicum). Dutis a fasin part de stesse famee e dutis a son leadis a fîl dopli al om. Parcè che si son evoludis par fâ il nît dongje des nestris cjasis o stalis e i câs di nidificazion in ambients naturâi a son une vore rârs. E ancje par lôr, come par tantis altris bestiis che a stan sparint, al è l’om un dai imputâts principâi pal fat che a son simpri di mancul. E nol baste visâ che dute la famee di uciei che e cjape dentri ancje lis cisilis e je protezude, parcè che al è ancjemò cualchidun che par no vê fastidis al tire vie i nîts tacâts sot dal cuviert, simpri che no sedin restâts vueits, come che si viôt simpri plui dispès.
Magari cussì no la conferme che la situazion no je des miôr nus rive dal faunist Fulvio Genero, che nus vise dal fuart sbassament dai uciei in gjenerâl, par vie di une vore di fatôrs: “Ancje se no son dâts pe nestre regjon (alc al è stât fat a Pordenon indulà che al è un progjet e la popolazion di cisilis e jere rivade a nome cuatri nîts tal 2024, par dopo tornâ a lâ sù fintremai a 15 nîts l’an dopo, e ancje a Triest), l’alarme pe riduzion fuarte dai uciei di cheste famee al è fuart. A pesin no dome il fat che a àn simpri mancul puescj indulà fâ il nît par vie che a son simpri mancul cjasis rurâls o stalis buinis di dâ acet, il fat che tai cjamps si doprin masse velens e a son simpri mancul naturâi cul risultât che i insets a son calâts une vore e duncje chestis bestiis a àn simpri mancul ce mangjâ. E come se nol fos avonde, al tocje fâ i conts cui cambiaments climatics che a stan provocant un sfasament dai timps di migrazion: cuant che a rivin chi di nô lis cisilis, e plui in gjenerâl i uciei che a mangjin insets, a cjatin cundizions par nuie otimâls. Par di plui, chei che a svolin de Afriche a son plui a risi par vie de desertificazion, che e slungje il lôr viaç”.
Ancje Silvana Di Mauro de associazion “Liberi di volare” di Triest, che di agns e je impegnade a protezi chescj uciei e che e gjestìs ancje un centri di recupar, e conferme che la situazion e je grivie: “Al è evident che al sedi un fuart sbassament de popolazion des cisilis e ancje di chês altris speciis. Tal câs di Triest, i tancj lavôrs fats par meti a puest cjasis e palaçs a àn sdrumât nîts e taponât lis busis indulà che prime i uciei a lavin a vivi. Ancje la mancjance di insets, par vie dai velens doprâts tai cjamps e no dome, a son un dai problemis plui grivis. Chest an al è dopleât il numar di uciei rivâts par jessi curâts tal nestri centri – une vore di esemplârs a rivin chi di nô scanâts o malâts -, intant che il lôr numar al è forsit la metât a pet dai agns passâts e chest al mostre cetant grivie che e je la situazion. O cirìn di tutelâ i lôr nîts e di meti sù ancje chei artificiâi, a son aromai passe 600, par cirî di judâ chescj uciei”.
Viodi svolâ lis cisilis al è un dai spetacui che nissun al varès di pierdi, ma se no volìn che al deventi un ricuart al sarès il câs di no fâ deventâ il nestri ambient simpri plui artificiâl. (a.d.g.) – 18.06.2026
