Il centri di Udin al è pront par clamâ dongje i visitadôrs cun dute une schirie di events che a savaran contentâ i desideris di grancj e piçui.
Tra lis tantis propuestis, no podevin mancjâ i laboratoris par fruts e par zovins par cure de Societât Filologjiche Furlane, cun chê di creâ moments di straviaments pes fameis, ma ancje par tornâ a scuvierzi l’inzen e la bielece dal nestri artesanât.
A tacâ des 2 e mieze daspò misdì di joibe ai 8 di Dicembar, alì dal Vilaç di Barbe Nadâl in place Sant Jacum, in gracie dal laboratori “Grops” cun Patrizia Torresin, si podarà sperimentâ la art dal instreçâ, doprant diviers materiâi (vencs e curdelutis) par creâ decorazions di Nadâl. La Sabide dai 10 di Dicembar e sarà invezit dedicade aes decorazions dal arbul di Nadâl: a tacâ des 10.00, adun cun Balthazar – Mostre sientifiche interative permanente di Montreâl, si podarà divertîsi a creâ origamis cetant origjinâi. In spiete di Sante Luzie, lunis ai 12, aes 5 daspò misdì, tal Salon di Onôr di Palaç Mantica e vignarà fate la leture animade dal libri “Il tesaur di Aurelianus”, in compagnie de ilustradore Barbara Jelenkovich. Cun di plui, al è in program un laboratori cu lis tessaris par creâ decorazions ispiradis ai mosaics di Aquilee, in ocasion dai 100 agns de Scuele mosaiciscj di Spilimberc.
I apontaments a laran indevant cuntun incuintri par fâ ogjets di feltri e cun apontaments indreçâts aes scuelis.
Tal câs che al sedi brut timp, ducj i laboratoris si fasaran in palaç Mantica, sede de Societât Filologjiche Furlane (vie Manin, 18). (ADG) – 6.12.2022
