A voltis al sucêt di cjatâ une biele sorprese. Al è sucedût a cui che al scrîf, lant par câs li de sagre di Campagnole a Glemone, inmaneade dal Comitât Borc di San Pieri.
Cheste sagre e je rivade ae edizion numar 43 e pardabon no somearès nuie di ce cjalade de strade, parcè che si viôt un sempliç tendon dilunc de Pontebane. E invezit, in chel tendon si cjate une organizazion, un servizi e une cualitât dal mangjâ che a son di alt nivel, cence par chest scugnî domandâ un prestit in bancje.
Par dile dute, cuant che o vin sintût che il frico (spetacolâr) al jere preparât di persone des sioris che a lavorin in cusine, no crodevin aes nestri orelis e o vin domandade conferme, ma e je propit cussì. Il tendon nol è cussà ce grant, ma forsit al è ancje par chest che nus è someât di jessi tornâts aes fiestis di paîs di une volte, indulà che si pues mangjâ ben cence vê il pinsîr di cjatâ un bleon di int e indulà che dut al lave come un orloi svuizar. Compliments a ducj chei che a lavorin a chest piçul miracul. (a.d.g.) – 27.06.2025