Screât l’an di formazion de Scuele dai Mosaiciscj

Cuntune cerimonie uficiâl al è stât screât il centesim cuart an di formazion de Scuele dai mosaiciscj dal Friûl, pe ocasion no te sede di Spilimberc, ma te glesie dai sants Josef e Pantalon, là che si cjate une “Via Crucis” fate tai agns Setante dai arlêfs de scuele. Chest an i arlêfs a son uns setante, dividûts tai trê cors che a fasin part dal percors par deventâ “mestri mosaicist” e a vegnin di parts diferentis dal Mont e no dome di chenti e dal rest de Italie. La scuele, che e je stade screade passe un secul indaûr, e je la uniche in dut il Mont no dome a ufrî la cognossince artesanâl, ma a formâ imprenditôrs specializâts te art dal mosaic. (A.I.) – 30.09.2025