S. Denêl, al siere il teatri sot dai arbui

Daspò dal sucès tai parcs di Feagne, Copule, Manià e Spilimberc, la rassegne di “Teatri sot dai arbui”, inmaneade dal Molino Rosenkranz, e siere miercus ai 15 di Lui tal parc di Vile Serravallo a S. Denêl. L’event finâl de diesime seconde edizion de serie, che e esplore il confin jenfri spetatôr e atôr, al ufrîs un viaç pai fruts e pes fameis cun spetacui, laboratoris, oportunitâts par zuiâ adun e scuvierzi alc di gnûf. A son in program une ativitât gratuite pai fruts e un spetacul: chel sielt al è la flabe “I tre porcellini”, intune version di Maurizio Corniani dal centri teatrâl “Corniani” de Lombardie. (A.I.) – 14.07.2026