Dopo de presentazion di un progjet par fâ su un grant implant a biometan pôc lontan de frazion di Fontanebuine di Pagnà a àn tacat a saltâ fûr linzûi blancs che a disin un clâr No! Al implant dilunc des stradis dal Comun.
E je pardabon fuarte la preocupazion de int e dal Comitât nassût di pôcs dîs a pet de intenzion di un consorzi di impresis di fâ l’implant che al varès di produsi 300 metris cubis par ore.
“O sin pronts a da bataie – al à dit Adriano Runcio, puartevôs dal comitât – cuintri di une iniziative che e fiscarès un paisaç agricul tra i plui biei dal Friûl. O domandarin di jessi clamâts inte Conference dai servizis e o cirarìn di presentâ studis sul impat fuart che al varà chest implant, e di informâ plui che o podin la int no dome di Pagnà, ma ancje di Colorêt di Montalban e di Tresesin. Un implant di cheste fate al varès di jessi metût intune zone industriâl e no tal mieç di une campagne come che chi, indulà che a varessin di fa su ancje une strade asfaltade di plui di un chilometri par rivâ tal implant che al puartarès cetant ciment indulà che a son nome prâts e cjamps”. (a.d.g.) – 17.07.2025
