A son stâts rinfuarcîts de bande dal servizi di vigjilance de Federcaccia dal Friûl-Vignesie Julie controi par dâ cuintri e prevignî l’abandon dai animâi domestics che, magari cussì no, a son un probleme soredut dilunc dal Istât e che par chest al domande plui atenzion. Il so personâl si zonte cussì ai agjents dal Cuarp forestâl regjonâl e a chês altris fuarcis dal ordin.
La rivade di gnovis vuardiis al permetarà di jessi plui presints intes zonis indulà che e je plui int. “O sarìn simpri presints – al à fat savê il coordenadôr regjonâl Salvatore Salerno – cul obietîf di intervignî se o viodìn che cualchidun nol rispiete la leç e nol garantîs il benstâ des bestiis, par dâ cussì cuintri a dutis lis formis di maltratament”.
Te suaze de campagne di prevenzion, lis patuliis dal servizi di vigjilance a stan fasint controi ancje dilunc des autostradis e intes areis di servizi, soredut intai autogrill indulà che la int si ferme par mangjâ, ancje par sensibilizâ i citadins e dâ une man par prevignî l’abandon. Ancje par chest la associazion dai cjaçadôrs e vise che il fat di bandonâ une besteute domestiche al è un reât che al ven punît dal articul 727 dal Codiç penâl cu l’arest fintremai a un an o cuntune amende di 1.000 a 10.000 euros.
A saran fats controi ancje su cemût che si puartin i cjans tai spazis publics, che a saran plui fuarts tai parcs citadins, intes localitâts de mont, tes malghis e tai ripârs, daspò che a son rivadis une vore di segnalazions de bande di residents e turiscj. “I proprietaris a son obleâts – al vise Salerno – a puartâ ator i lôr cjans doprant la cjavece e, tai câs previodûts de normative, ancje a meti la musarole. Il rispiet di chestis regulis al è fondamentâl par garantî la sigurece dai animâi e des personis”. Par vê informazions o fâ segnalazions, si pues clamâ il servizi di vigjilance di Federcaccia Fvg al 331-3504109. (a.d.g.) – 07.08.2026
