Pe Societât Filologjiche Furlane lis convenzions cu la Rai a son di rinovâ

da Alessandro Di Giusto

La Societât Filologjiche Furlane e je une vore atente al dibatit che al à cjapât pît tai ultins mês su lis prospetivis de ufierte radiotelevisive de Rai a pro des minorancis storichis-lenghistichis che a son sul teritori regjonâl, e in particolâr di chê furlane.

La Filologjiche e je a pro de propueste di rinovâ lis convenzions su lis trasmissions dai programs radiotelevisîfs dedicâts aes minorancis regjonâls: par une ufierte complete e di cualitât al è fondamentâl meti in vore une programazion informative gjornalistiche cuotidiane in lenghe furlane, la digjitalizazion dai archivis dai programs pes minorancis linguistichis e previodi il justament cualitatîf in alte definizion dai segnâi televisîfs regjonâi e la introduzion dai canâi radiofonics in tecnologjie digjitâl.

Chestis istancis si riferissin in sostance al servizi che la sede RAI di Bolzan e garantìs bielzà aes valadis ladinis des Dolomitis, a mieç di une struture che e cjape il non, a pont, di “Rai Ladinia”, che e va in onde sul canâl Rai 3 Südtirol. E je di caratar gjeneralist, cul telegjornâl TraiL (trasmetût su lis frecuencis de RAI 3bis) e cun documentaris e programs di informazion centrâts su lis valadis ladinis. Il program radiofonic in lenghe ladine al è plui larc rispiet a chel televisîf: di fat al propon doi notiziaris dal lunis a la sabide, une edizion la domenie e programs di atualitât ogni dì.

In chestis zornadis il Consei regjonâl dal Friûl – Vignesie Julie al è clamât a dî la sô suntune mozion che e je stade presentade di ducj i grups consiliârs: si spere inte aprovazion unanim di bande de assemblee regjonâl, che dal sigûr e coventarès par puartâ indevant lis istancis dal popul furlan su la presince de marilenghe tal servizi public radiotelevisîf.

E coventarès ancje la adesion plene e cunvinte dai tancj comuns furlans che in chestis setemanis a fasin bogns tai conseis comunâi ordins dal dì a pro de presince dal furlan in RAI. Ma al è impuartant che dute la opinion publiche e il mont culturâl furlan a poiedin cheste istance par podê inmaneâ in curt une manifestazion a pro de RAI in lenghe furlane.

La popolazion e lis istituzions a àn aromai madressût une cussience vere e salde viers il ricognossiment e la tutele, intune prospetive pluraliste, des minorancis storichis-lenghistichis regjonâls, di meti in vore ancje a traviers de informazion e de programazion radiotelevisive dal servizi public. (a.d.g.) – 29.01.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui