Cui isal che nol à mai gjoldût tal nulî il profum dal pan a pene cuet e ancjemò cjalt cuant che al jentre intun for? Se e va indenant cussì, cheste esperience sensoriâl e podarès deventâ, magari cussì no, un ricuart.
“Il for al è sierât par motîfs di salût”. Al è il cartel cjatât cualchi mês indaûr dai clients dal for Midena di Maian, sierât no si sa par trop timp, parcè che il so titulâr Roberto Midena al sta pôc ben.
Pe int e je stade pardabon une sorprese brute, sedi pal fat che cetancj di lôr a jerin usâts a cjoli il pan di Midena, sedi parcè che cun cheste sierade al reste cumò in ativitât dome il for gjestît di Silvano Foschiatti. Se di no, nol reste che lâ a cjoli il pan tai supermarcjâts, fresc ma produsût a nivel industriâl e za pront intun sacut di plastiche o precusinât.
La situazion di Maian no je dal sigûr une novitât in Friûl, parcè che di timp il mistîr dal pancôr al patìs pe mancjance di ricambi gjenerazionâl e parcè che in cetancj altris paîs a stan frontant il stes probleme, come che nus vise Pierluigi Orlandi, coordenadôr dal Grup pancôrs di Confcommercio Udine: “Si sta regjistrant a nivel talian la riduzion dal numar di fors e par di plui al tocje ancje fâ i conts cu la desertificazion dai centris plui piçui. La Regjon Friûl-Vignesie Julie e sta cirint di sostignî e judâ lis buteghis piçulis, ma tal câs dai pancôrs al pese une vore il probleme dal ricambi gjenerazionâl, che al mancje intune vore di aziendis e cuant che un titulâr si inmale o al va in pension il for al siere. Cundut che cualchi zovin al rive, o fasìn cetante fature a cjatâ fantats bogns di inamorâsi di chest mistîr. Il stes probleme di Maian lu àn a Manzan, intes Vals dal Nadison, a Nimis e in altris paîs, indulà che la int e lamente il discomut di scugnî lâ a comprâ il pan intai centris plui grancj o, in alternative, cuant che a son, tai supermarcjâts. Magari cussì no, cu la sierade dai fors o pierdìn la tipicitât e la gjenuinitât dai prodots locâi. Parcè che al è clâr – al sotlinee Orlandi – che a son propit i piçui fors di paîs a difindi e a vuardiâ la specialitât e il fat che un prodot al è la espression di chel teritori. Al è cualchi zovin che al à inviade la ativitât e che al à voie di fâ, judât ancje dal fat che lis gnovis tecnologjiis a rindin il mistîr mancul pesant di une volte. Al covente dut câs cetant impegn ancje dal pont di viste de famee e al è impuartant dâ une man a chescj zovins”. (a.d.g.) – 21.04.2026
