Maman! de television ae Fieste dal miluç di Tumieç

Inte suaze de “Festa della Mela” di Tumieç al torne “Cjantâ e zuiâ cun Maman!”, un apontament cun Daria Miani e il mont colorât di Maman!, il program tv in lenghe furlane che ur plâs une vore ai fruts. Sabide ai 17 di Setembar, a tacâ des 15.30, sot dal tendon di place 20 di Setembar, si podarà cjantâ, zuiâ cu la “Ruede de Fortune” e divertîsi cul laboratori di piture. Ae fin, ducj i partecipants a varan i gadget de trasmission, che e tacarà la sô setime stagjon ai 7 di Otubar, plene di novitâts, piçui amîs e une gnove rubriche par zuiâ cul furlan e cul inglês! Maman! e je une trasmission televisive pe infanzie in lenghe furlane, risultât di une coproduzion de ARLeF e di Telefriuli. Un contignidôr pai fruts de scuele materne e primarie, siôr di rubrichis, cartons animâts, leturis, musiche e zûcs, cu la conduzion di Daria Miani. (A.I.) – 14.09.2022