Daspò de Sale dal priorât, plene di int rivade di dute la provincie, dilunc dal apontament inmaneât a Ospedalet di Glemone, domenie ai 19 di Zenâr, cuant che Angelo Floramo al à fevelât de storie dal Friûl e di trop che cheste tiere e sedi stade segnade di une ciclicitât sismiche che e fâs impression, al va indenant il program di events inmaneâts de associazion Glesie furlane te suaze dal cincuantesim aniversari dal taramot.
In dut a son sîs incuintris che a daran ae int la pussibilitât di scoltâ inteletuâi, sienziâts e predis bogns di puartâ une vision diferente dilunc dal troi bande des celebrazions dal mieç secul di cuant che l’Orcolat al à fiscât il Friûl.
Il prossim apontament, ai 8 di Fevrâr, come simpri di domenie e tal dopomisdì aes trê e mieze, al sarà li dal Palaç Orgnani Martina a Vençon, indulà che pre Rizieri De Tina e pre Luigi Gloazzo a puartaran la lôr testemoneance di predis che si son cjatâts in prime linie cuant che la int e à cjatât ripâr intes tendopolis.
In Març il tierç apontament, cheste volte inte sale consiliâr dal municipi di Osôf cuant che Igor Londero al fevelarà di “Une gnove nozion dal modello Friuli”. (a.d.g.) – 22.01.2026
