L’impuartant al è sperimentâ: presentât il gnûf Bant pal Welfare de Fondazione Friuli

da Alessandro Di Giusto

Peraule di bataie: sperimentâ! Cun chel sburt ideâl il president de Fondazione Friuli, Giuseppe Morandini, al à presentât il gnûf Bant pal Welfare, ven a stâi par ducj i progjets che a pontin a tignî in pîts lis comunitâts che si judin, dulà che lis fameis che a àn frutins, vecjos e disabii no vegnin lassadis di bessolis. E ancje par chest an a son 600 mil i euros metûts a disposizion de Fondazion, che e judarà ent publics (come i Comuns) e privâts (come chei dal Tierç Setôr), miôr ancjemò se a proponin un progjet insiemi. Lis domandis a van presentadis dentri dai 29 di Fevrâr.

“Dome sperimentant si cjatin soluzions par problemis imberdeâts come chei che lis nestris comunitâts a stan frontant in dì di vuê – al à dit Morandini -. Insiemi ae Regjon e al grup bancjari Intesa Sanpaolo o rivìn, di vot agns in ca, a judâ ativitâts che a pontin a coinvolzi i plui debii traviers il sport, il lavôr e la scuele, a doprâ tecnologjiis inovadoris, a rindi la vite plui semplice aes fameis. Tantis sperimentazions fatis fin cumò a son deventadis servizis fis e cussì o speri ancje in chest gnûf Bant”.

I risultâts dai ultins trê agns a son stât metûts sot de lint dal Istitût Jacques Maritain, che al lavore su cuistions sociâls. Al ven fûr che i progjets sostignûts de Fondazione Friuli a fasin no dome servizis pe int che e à bisugne, ma ancje pai lôr familiârs. In plui, i progjets che a àn fat formazions a son passâts dal 50 par cent dal 2020 al 60 dal 2022.

In ocasion de presentazion, fate inte gnove sede de Fondazione Friuli tal palaç Antonini-Stringher a Udin, al jere presint ancje l’assessôr regjonâl Riccardo Riccardi.

“La Fondazion e à dimostrât cui fats che un lavôr inovadôr e cooperatîf al pues no dome rispuindi ai dibisugns des personis, ma ancje al met lis fondis par un doman plui just e che nol dismenteedi nissun”. (r.c.) – 23.01.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui