Librinfesta, un program siôr di events

A Roncjis di Monfalcon al è tornât il festival leterari “Librinfesta”, ae sô diesime edizion, inmaneât dal assessorât ae culture e de biblioteche “Sandro Pertini”. La grande fieste dal libri e de leture si davuelç fint ai 18 di Avrîl dentri dal Palatenda tal Excelsior di Via Roma, ufrint al public un moment di condivision e riflession e un riferiment culturâl par dut il teritori. Il program al è une vore penç e al previôt une schirie di incuintris cul autôr, spetacui leteraris, visitis vuidadis ae scuvierte dai lûcs storics – de vile Romane ae vile Vicentini Miniussi – une cjaminade leterarie cun Andrea Bellavite e Angelo Floramo, mostris e laboratoris. I ospits a son une grum: di Piero Dorfles a Donato Carrisi, Oscar Farinetti, Daniele Novara, Alessandro Cattunar, Marzio G. Mian, Michela Marzano, Chiara Montani, Concita De Gregorio e Mauro Corona. (A.I.) – 13.04.2026