30-05-22. Tornâ ae nature o valorizâle pe comunitât? A chest grant dileme al à cirût di rispuindi il prin apontament de Dolomiti Mountain School, dal titul “Rigjenerâ paisaçs e architeturis di mont”, organizât de Regjon Friûl Vignesie Julie cu la “Comunità di montagna” de Cjargne. “Insiemi ae Fondazione Dolomiti UNESCO – al à comentât Marco Lenna, il sindic di For Disore, che e à ospitât la iniziative – o fevelìn di rigjenerazion dai paisaçs e di architeture dismenteade. A son ducj elements che a puedin deventâ un stimul par rivâ a fâ ancjemò di plui par atirâ int in chescj teritoris”.
Il fin fondamentâl de Mountain School al è cirî di capî cemût operâ in mont, lant a indagâ varis aspiets che di norme a vegnin trascurâts di cui che al interven sul teritori. Al è un prin pas bande la restituzion de mont ae proprie funzion, partint dal esempli di Pineland, il scheletri architetonic di une vile turistiche dai agns Sessante, progjetât propit a For Disore dal architet Marcello D’Olivo. A.I.
