La Fieste de Patrie e va indevant te Basse

A van indevant i apontaments pe Fieste de Patrie dal Friûl inte Basse, inmaneade dai sîs Comuns di Cjarlins, Gonârs, Muçane, Porpêt, Prissinins e S. Zorç di Noiâr, in colaborazion cu la Societât Filologjiche Furlane e cul finanziament de ARLeF. Joibe ai 30 di Avrîl, a 9 di sere, tal auditorium di Prissinins al va in sene pe prime volte il gnûf spetacul de compagnie Teatri Viart di Muçane “Salaif, un paîs”, in colaborazion cu la Associazion Teatrâl Furlane. Un burlaç di Avost al rive a scjassâ l’ecuilibri di un paisut de mont… Il test al è di Lorena Bassi, la regjie di BRAT (Agata Garbuio e Claudio Colombo). Domenie ai 3 di Mai, a 8 e meize di sere, alì de Vile Muciana di Muçane, invezit, e je in program la leture in musiche “Fiore di roccia”, gjavade fûr dal libri di Ilaria Tuti dedicât aes puartadoris cjargnelis, cu la musiche dal mandulin di Andrea Miola e de ghitare di Giulia Pizzolongo. (A.I.) – 29.04.2026