La autoemoteche e jentre inte caserme Mittica di Pordenon

da Alessandro Di Giusto

Prime donazion coletive di sanc cun autoemoteche inte caserme Mittica di Pordenon. A promovile al è stât il gjenerâl di Brigade, Marco Longo, a un mês e mieç di cuant che al è deventât comandant de 132ª Brigata Corazzata Ariete. A pene rivât Longo si è dât daurman di fâ par promovi il don dal sanc in mût periodic ancje tra i 400 militârs de caserme. Di agns, il gjenerâl Longo al è donadôr di sanc e al è sigûr che chest compuartament volontari e gratuit al sedi un dovê civîl di ogni persone e un dovê morâl soredut par un soldât che al fâs de solidarietât bande la popolazion la sô mission principâl.

Cun chest spirt, il comandant al à volût screâ une colaborazion cu la Associazion provinciâl furlane donadôrs di sanc, che lunis ai 14 di Novembar e à organizât la prime donazion coletive dentri de caserme Mittica. La iniziative e je stade cjapade cun entusiasim dai militârs: a àn dât la lôr disponibilitât in 41, tra donadôrs periodics e gnûfs iscrits Afds; 24 a àn donât in caserme, intant che chei altris a cjaparan apontament lì dai Centris trasfusionâi dal teritori. Pe Afds al jere presint il president provinciâl Mauro Verardo, che al à ringraziât pe “grande disponibilitât dimostrade de bande dal comandant e pe gjenerositât dai militârs intal donâ”. Cun lui al jere ancje il conseîr provinciâl Mauro Strasorier. (ADG) -14.11.2022

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui