La esperience de ARLeF – Agjenzie regjonâl pe lenghe furlane tal setôr de comunicazion digjitâl e je stade indicade di pôc come model di riferiment a nivel european inte suaze dal progjet Crossterm, cofinanziât de Union Europeane midiant dal Program Interreg VI-A Italie-Slovenie.
A son stâts propit i partners dal progjet a invidâ la Agjenzie a presentâ la sô strategjie comunicative sui social networks – Facebook, Instagram, Youtube e TikTok – ricognossude tant che une des plui eficacis intal panorame de promozion linguistiche. I risultâts otignûts inte difusion de lenghe furlane e inte creazion di comunitâts digjitâls in costante cressite e che a partecipin simpri di plui a àn di fat clamât dongje chei che a son impegnâts inte valorizazion des lenghis e des culturis minoritariis.
Ae fonde dal sucès e je une strategjie, svilupade in colaborazion cuntun grup di professioniscj de comunicazion, che e à savût puartâ il furlan dentri de contemporaneitât, cun contignûts che a tocjin in maniere visive, lengaçs atuâi e un coinvolziment fuart dai utents. Une sielte che e à vût risultâts concrets e misurabii: dal 2020 a vuê il profîl Instagram al è plui che triplicât, al è passât di fat di 4.850 a 15.435 followers (+218%), intant che Facebook al à regjistrade une cressite superiôr al 130%, di 11.486 a 26.466 followers, cuntune cuintritindince fuarte a pet dal calâ progressîf dal ûs de plateforme in tancj Paîs europeans.
Une vore significative e je ancje la esperience di “Tic e Tac Furlan”, il profîl TikTok de ARLeF che, in pôc plui di trê agns, al à vuadagnât 20.500 followers in graciis di pirulis curtis di lenghe furlane che a cjapin dentri il public e che a àn puartât in medie passe 10 milions di impressions ad an.
Tra i progjets presentâts ai partners europeans che a àn vût plui sucès al è ancje YoupalTubo, il canâl di YouTube nassût tal 2022 de colaborazion cuntun grup di zovins creators cun mancul di 30 agns. L’obietîf al jere ambiziôs: svicinâ lis gnovis gjenerazions ae lenghe e ae culture furlane cu la ironie, la creativitât e formats origjinâi. Une sfide vinçude. Vuê il canâl al à 140 videos, cirche 18.000 iscrits e cuasi un milion di visualizazions ogni an, e si aferme tant che un dai esemplis plui impuartants di comunicazion digjitâl di une lenghe minoritarie.
Il valôr inovatîf di YoupalTubo al è stât ricognossût ancje a nivel nazionâl: di fat al è stât sielzût par screâ la prime edizion di Dixit, il festival dedicât ae comunicazion digjitâl e ae inovazion, al à vût un ricognossiment pe capacitât di meti dongje lis lidrîs fuartis di un teritori cui lengaçs contemporanis. Ancje te edizion 2026 al è stât cetant preseât, e YoupalTubo al à tornât a vierzi il Festival.
L’incuintri cui partners dal progjet Crossterm al à rapresentât une ocasion impuartante di confront e di trasferiment di buinis pratichis, e la ARLeF e à rivât a condividi un model operatîf concret e che si pues replicâ. Un model che al dimostre cemût che, ancje pes lenghis minoritariis, al sedi pussibil otignî risultâts di grant rilêf se si invistìs su contignûts di cualitât, su la costruzion di comunitâts digjitâls e se si doprin lengaçs plui dongje aes gnovis gjenerazions.
Vuê la comunicazion digjitâl e rapresente une tra lis oportunitâts plui potentis par garantî vitalitât e avignî aes lenghis minoritariis. Duncje nol è di maraveâsi che il model ARLeF al sedi daûr a stiçâ interès ancje tal mont academic: propit in chescj mês al è di fat ogjet di studi di une ricercjadore de Ulster University, impegnade tal analizâ i struments di politiche linguistiche pe promozion intergjenerazionâl dal furlan e dal galês. (a.d.g.) – 25.06.26
